Kyai Pendakwah VS Supir Bis Ugal-ugalan

Hee arek-arek kabeh!!

Kerono oleh request teko konco, dadi postingan kali iki nggae boso jowo. Sepurane wong jawa tengah, sepurane wong jogja, sepurane wong jawa timur liyane soale postingan iki ditulis nggae boso malangan. Terimoen ae yo huahahah :D

Oke, dadi aku entuk cerito iki teko bapakku seng tepak iku tausiyah ndek Pasuruan.

Ngene ceritone.

Dikisahno pas wong-wong islam kate mlebu surgo, onok antriane. Mulai paling ngarep barisane poro nabi, moro poro sahabat, mari ngunu poro alim ulama, poro kyai, poro wong seng loman atine sampek seng paling mburi wong seng rodok methel tapine sek duwe iman marang Gusti Allah.

Tibake diantara wong-wong biasa seng loman atine namung dudu poro kyai, nyempil siji kyai. Moro kyai iki protes nang malaikat seng ngatur antrian.

"Malaikat, samean iki mboten keliru a? Mosok barisanku ndek kene?" takone kyai.

"Oh, mboten kyai. Niki pun enten datane. Njenengan nggeh ten mriku." jare malaikate.

"Cobak samean cek se. Wong poro kyai iku lho podo ndek barisan ngarep." Kyaine sek ngeyel ae.

"Ngajenge njenengan, Supri?"

"Nggeh."

"Wingkinge njenengan, Sukro?"

"Nggeh."

"Nggehpun bener njenengan ten mriku."

Kyai iku sek pancet gak trimo ae rupane. Barang celingak-celinguk ndelok ndek deretane poro kyai onok wong seng de'e kenal, kyai iki protes. "Lho, malaikat! Lha kok ndek jejere poro kyai iku onok tonggoku? Iku seng ketok mbladus, rupane lak Jumain!" wes kyai iki bengok-bengok karo tuding-tuding Jumain.

"Nggeh, terus laopo?"

"Wong Jumain iku lho supir bis, tapi lek nyupir yo gak genah! Ugal-ugalan ngono kok."

"Ngeten, nggeh, kyai." malaikat iku sek sabar ae njelasno. Pancene malaikat gak duwe emosi. "Jumain lek nyupir bis ancene ugal-ugalan, tapine iku nggarakno penumpange mboten saget tilem ten bis soale deg-degan. Lhalek nyupire gak genah ngunu mau, wonge podo turu opo moco selawat? Lek ngoten masio nyupire gak genah tapi nggarakno wong sak bis nyebut asmane Gusti Allah, iling ten Gusti Allah. Lha samean, ceramah kesuwen, seng onok jamaahe podo bosen akhire ngerungokno karo klangopan lan ngantuk, sampek ono seng keturon. Ceramahe samean guduke nggarai jamaah sadar tambah lek wes turu ngono jamaahe samean opo iling nang Gusti Allah? Dapak iling tambah lali kabeh, Kyai."

Kyai mau langsung kicep.

Aku yo kicep.

Samean seng podo moco, yo akeh seng kicep.

Nah ngoten iku lho. Apike statuse wong nggeh dereng mesti amalane pun apik. Mandar mugo kito sedoyo saget dadi pribadi seng apikan nggeh.

Samean semerap, sinten seng ndamel cerito niki? KH Abdurrahman Wahid, Gus Dur.